மென்பொருள் உருவாக்கம்

1986-87 இல் கணிப்பொறி ஓர் அபூர்வப் பொருளாய் இருந்த காலத்திலேயே நான் பணிபுரிந்த அலுவலத்தில் இருந்த கணிப்பொறியில் மூழ்கிப் போனேன். யாருடைய உதவியுமின்றி நானாகவே கற்றுக் கொண்டேன். அலுவலகத்தில் அனைவருக்கும் கற்றுக் கொடுத்தேன். ஓராண்டு கடுமையான உழைப்பில் எம்எம்எஸ் (Mux Maintenance System) என்னும் மென்பொருள்களை உருவாக்கி, 1989-ஆம் ஆண்டிலேயே எங்கள் அலுவலகத்தைத் தாளில்லா அலுவலகமாய் (Paperless Office) மாற்றி அமைத்தேன். அதற்காகப் பாராட்டுச் சான்றிதழும், ஊக்கத் தொகையும் பெற்றேன். எங்கள் அலுவலகம் ‘சிறந்த நிலையம்’ என்ற பெயரையும் பெற்றது.

தமிழ்நாடு வட்டத் தொலைதொடர்புத் தலைமையகத்தில் பணிபுரிந்தபோது மிஸ்ட் (Management Information System for Telecom) என்னும் மேலாண்மைத் தகவல் மென்பொருளை உருவாக்கி, தமிழ்நாடு முழுவதும் மாவட்ட அலுவலகங்களில் அவற்றை நிறுவினேன். பத்து நாட்கள் பாடுபட்டுத் தப்பும் தவறுமாகத் தயாரிக்கப்படும் மேலாண்மைத் தகவல் அறிக்கையை மென்பொருள் மூலமாகப் பத்து நிமிடத்தில் துல்லியமாகத் தயாரிக்க முடிந்தது.

மண்டலத் தொலைதொடர்புப் பயிற்சி மையத்தில் பணியாற்றிய காலத்தில் பயிற்சி முடித்த மாணவர்களின் இறுதித் தேர்வு முடிவுகளை தர வரிசைப்படி வெளியிடும் மார்க்சிஸ்ட் (MarkSyst) என்னும் மென்பொருளை உருவாக்கி நடைமுறைப்படுத்தினேன். தலைமைப் பொது மேலாளர் அலுவலகத்தில் பொதுமக்கள் புகார்களைக் கையாள மாக்பிஜி (Ministry of Communication Public Grievence) என்னும் மென்பொருளை உருவாக்கித் தந்தேன்.

வளர்தமிழ் பதிப்பகத்துக்கு (வளர்தொழில், தமிழ் கம்ப்யூட்டர் வெளியீட்டாளர்) பத்திரிகைச் சந்தாக்களைக் கையாளும் சப்ஸ்கிரிப் (Subscrip) என்னும் மென்பொருளைத் தயாரித்துக் கொடுத்தேன். ஏனோ அதனை அவர்கள் பயன்படுத்தவில்லை.

கர்நாடக மாநிலத்து தொலைதொடர்பு நண்பர்களின் வேண்டுகோளுக்கு இணங்க, ஓசிபி வகைத் தொலைபேசியகங்களில் மின்காந்த நாடாவிலிருந்து தொலைபேசி அழைப்புகளின் விவரங்களைப் படித்தறிவதற்காக ஓசிபிஎட்ரெட் (OCBEdRet – OCB Exchange Data Retrieval) என்னும் மென்பொருளை உருவாக்கிக் கொடுத்தேன். குற்றவாளிகளின் தொலைபேசி அழைப்பு விவரங்களைத் தோண்டியெடுத்து, எந்த நேரத்தில் யார்யாரோடு பேசினார்கள் என்று கண்டறியப் பயன்படும் மென்பொருள் அது. கர்நாடகாவிலிருந்து ஒவ்வொரு மாநிலமாகப் பரவி, நாளடைவில் இந்தியா முழுவதும் அந்த மென்பொருளைப் பரவலாகப் பயன்படுத்தினார்கள் என்று எனக்கு வந்த மின்னஞ்சல்கள் தெரிவித்தன.

எம்.சி.ஏ. படிப்பின் திட்டப்பணியாக, தமிழ் ஓசிஆருக்குப் (Optical Character Recognition) பயன்படக் கூடிய, ஆவண உருவரை உணர்தலுக்கான (Document Layout Recognition) மென்பொருளை, செயற்கை நுண்ணறிவுத் தொழில்நுட்பத்தின் அடிப்படையில் உருவாக்கினேன்.

சென்னைத் தொலைபேசியின் தகவல் தொழில்நுட்ப மையத்தில் பணிபுரிந்தபோது, சென்னைத் தொலைபேசியின் கணிப்பொறித் தரவுத்தளத்தில் ஒற்றை வரியில் சேமிக்கப்பட்டிருந்த பத்து லட்சம் வாடிக்கையாளர்களின் வீட்டு முகவரியைப் பெயர், கதவெண், வீட்டுப் பெயர், தெரு, ஊர், வட்டாரம், நகர், பின்கோடு எனப் பிரிக்கக் கூடிய செயற்கை நுண்ணறிவு மென்பொருளை உருவாக்கினேன்.

பத்திரிகை, வானொலி, தொலைக்காட்சி

1993-94 ஆம் ஆண்டுகளில் தினமலர் நாளிதழில் கற்போம் கம்ப்யூட்டர் என்னும் தலைப்பில் கணிப்பொறிப் பாடங்களைத் தமிழில் எழுதினேன். 1994 முதல் 2006 வரை தமிழ் கம்ப்யூட்டர் இதழில் சி, சி++, சி#, நெட்வொர்க் பாடங்களை எழுதினேன். கணிப்பொறி தொடர்பான வாசகர்களின் கேள்விகளுக்குப் பதில் எழுதினேன். கணிமொழி இதழில் கட்டுரைகள் எழுதியுள்ளேன். 2004-05 ஆண்டுகளில் தினமணி நாளிதழில் கம்ப்யூட்டர் A to Z என்னும் தொடரை எழுதினேன். மனோரமா தமிழ் இயர்புக்கில் 1997 முதல் பல ஆண்டுகள் தொடர்ந்து, கணிபொறி, இணையம், பிணையம், மின்வணிகம், மின்வெளிச் சட்டங்கள், செல்பேசித் தொழில்நுட்பங்கள், வயர்லெஸ் தொழில்நுட்பங்கள் பற்றிய கட்டுரைகளை எழுதியுள்ளேன்.

சென்னை வானொலியில் காலை நிகழ்ச்சியில் தினமும் தொடர்ந்து இன்று ஒரு தகவல் போல, அதிநவீன அறிவியல் தொழில்நுட்பங்களை அறிமுகப்படுத்திப் பேசியிருக்கிறேன்.

சன், சன் நியூஸ், விஜய் டீவியில் கணிப்பொறித் தகவல்களைக் கூறியிருக்கிறேன். வின் டீவியில் ஒரு மணி நேரம் நேரடி ஒலிபரப்பில் பார்வையாளர்களின் கணிப்பொறித் துறை தொடர்பான கேள்விகளுக்குப் பதில் சொல்லியிருக்கிறேன். மக்கள் டீவியில் சிறப்பு விருந்தினர் பகுதியில் கணிப்பொறி துறையில் பங்களிப்பு பற்றிய என்னுடைய பேட்டி ஒளிபரப்பானது.

கணிப்பொறி ஆசிரியர் பணி

1996 முதல் 2003 வரை தொலைத் தகவல்தொடர்புத் துறையின் பயிற்சி மையத்தில் கணிப்பொறி ஆசிரியராகப் பணிபுரிந்தேன். அதே காலகட்டத்தில் பாரதிதாசன் பல்கலைக் கழகத் தொலைநிலைக் கல்வியில் எம்சிஏ பயின்ற மாணவர்களுக்குச் சென்னைப் படிப்பு மையத்தில் சி, சி++, ஜாவா பாடங்கள் பயிற்றுவித்தேன். என் எழுத்துகளில், வகுப்புகளில் பலன்பெற்ற மாணவர்கள் பலர் இன்றைக்கு இந்தியாவில், வெளிநாடுகளில் தகவல் தொழில்நுட்பத் துறையில் உயர்ந்த பணிகளில் உள்ளனர். என் பங்களிப்பை நன்றியுடன் நினைவு கூர்கின்றனர்.

கணிப்பொறி அறிவியல் கலைச்சொல்லாக்கம்

கணிப்பொறியியல் கலைச்சொல்லாக்கத்தில் என்பங்கு கணிசமானது. தமிழ்நாடு அரசு 1999-இல் எழுத்தாளர் சுஜாதா தலைமையில் அமைக்கப்பட்ட கலைச்சொல்லாக்கக் குழுவில் இருந்து ஆஃபீஸ் மென்பொருளுக்கான 200 கலைச்சொற்களை உருவாக்குவதில் பங்கு வகித்தேன். Browser என்ற சொல்லுக்கு ‘உலாவி’ என்று நான் பரிந்துரைத்த சொல் ஏற்றுக் கொள்ளப்பட்டது. 2000-ஆம் ஆண்டு முனைவர் மு. ஆனந்தகிருஷ்ணன் தலைமையில் அமைக்கப்பட்ட கலைச்சொல்லாக்கக் குழுவில் உறுப்பினராக இருந்து, 8000 கலைச்சொற்களை உருவாக்கிக் கொடுத்தேன். அவற்றைத் தமிழ் இணையப் பல்கலைக்கழக வலையகத்தில் காணலாம். சர்வதேச அமைப்பான உலகத் தமிழ் இணைய மன்றத்தின் கலைச்சொல்லாக்கக் குழுவில் பணியாற்றி உள்ளேன். மணவை முஸ்தபா வெளியிட்ட கணினிக் கலைச்சொல் களஞ்சிய அகராதியின் முதல் தொகுதி என்னுடைய மேற்பார்வையில் வெளியானது. இரண்டாம் தொகுதி முழுக்க என் பங்களிப்பில் வெளியானது.

மைக்ரோசாஃப்ட் நிறுவனம் தன்னுடைய மென்பொருள்களின் தமிழ்ப் பதிப்பில் பயன்படுத்துவதற்காக ‘கம்யூனிட்டி குளோசரி’ என்ற பெயரில் பயனாளர்களிடமிருந்து கலைச்சொற்களைத் திரட்டியது. அதில் நான் பரிந்துரைத்த பெரும்பாலான கலைச்சொற்கள் ஏற்றுக் கொள்ளப்பட்டன. மைக்ரோசாஃப்டின் மென்பொருள்களில், அந்நிறுவன வலையகங்களில் அச்சொற்கள் இடம்பெற்றுள்ளன. மைக்ரோசாஃப்டின் துணை நிறுவனமான பாஷா இந்தியாவின் வலையகத்தில் கலைச்சொல்லாக்கம் தொடர்பான என்னுடைய பேட்டி வெளியாகியுள்ளது.

ஆய்வுக் கட்டுரைகள்

உலகத் தமிழ் இணைய மன்றம் சிங்கப்பூர், மலேசியா, அமெரிக்கா, சென்னை ஆகிய இடங்களில் நடத்திய சர்வதேசத் தமிழ் இணைய மாநாடுகளில் கலைச்சொல்லாக்கம் தொடர்பான என்னுடைய ஆய்வுக் கட்டுரைகள் தேர்ந்தெடுக்கப்பட்டு மாநாட்டு மலர்களில் பிரசுரிக்கப்பட்டுள்ளன.

பாடப் புத்தகம், நூல்கள்

2004-ஆம் ஆண்டு தமிழ்நாடு அரசு அமைத்த +1, +2 கணிப்பொறி அறிவியல் பாடத்திட்டக் குழுவில் (Syllabus Committee) உறுப்பினராக இருந்துள்ளேன். 2005-இல் +1 கணிப்பொறியியல் பாடப் புத்தகத்தையும், 2006-இல் +2 பாடப் புத்தகத்தையும் எழுதினேன். எம்.எஸ்சி. கணிப்பொறி அறிவியல் மாணவர்களின் பாடத்திட்டப்படி ‘வருங்கால மொழி சி#’ என்னும் புத்தகத்தை 2005-இல் வெளியிட்டேன். டி’பேஸ் வழியாக சி-மொழி, கம்ப்யூட்டர் இயக்க முறைகள், மின்னஞ்சல், டாஸ் கையேடு ஆகிய நூல்களை வெளியிட்டுள்ளேன். தமிழ் இணையப் பல்கலைக் கழகத்துக்காக பி.ஏ. தமிழியல் பாடத்துக்கான ‘தகவல் தொழில்நுட்பம் - ஓர் அறிமுகம்’ என்னும் பாடநூலை எழுதித் தந்துள்ளேன். ஃபிரெடரிக் ஏங்கெல்ஸ் எழுதிய ‘Ludwig Feuerbach and the End of Classical German Philosophy' என்னும் நூலைத் தமிழாக்கம் செய்துள்ளேன். [சுருக்குக]

துணைவியார் சாரதா. பி.எஸ்.என்.எல். நிறுவனத்தில் கோட்டப் பொறியாளராகப் பணிபுரிகிறார். மகள் ஜென்னி சினேகலதா. மகன் லெனின் ரவீந்தரநாத். ஜென்னியும், கணவர் பாலச்சந்தரும் அமெரிக்காவில், வாஷிங்டன் மாநிலத்தில் ரெட்மாண்டில், மைக்ரோசாஃப்ட் நிறுவனத்தின் தலைமையகத்தில் பணிபுரிகின்றனர். பேத்தி சிந்தனா பாரதி - முதல் வகுப்புப் படிக்கிறாள். பேரன் ஆதவ் பகத் - கின்டர் கார்டன் சேர்ந்துள்ளான். லெனின் அமெரிக்காவில் பாஸ்டன் நகரில் எம்.ஐ.டீ-யில் பி.எச்டி. பட்டத்துக்கு ஆய்வு செய்து வருகிறார். லெனினின் துணைவியார் தங்கம் அமெரிக்காவில் மைக்ரோசாஃப்ட் நிறுவனத்தின் தலைமையகத்தில் பணிபுரிகிறார்.

என்னுடன் பிறந்தவர்கள்: ஒரேவோர் அக்காள் தவமணி. பிள்ளைகள், பேரன், பேத்திகளுடன் கிராமத்தில் வசிக்கிறார். ஒரேவோர் அண்ணன் தங்கவேல். குடும்பத்துடன் சென்னையில் வசிக்கிறார். தமிழ்நாடு அரசுக் கருவூலத் துறையில் பணியாற்றி ஓய்வு பெற்றபின் செல்பேசிக் கடை நடத்துகிறார். துணையார் தனலட்சுமி. இவர்களின் மூத்த மகன் கண்மணி ராஜா சென்னையில் டெர்பி நிறுவனத்திலும், இளைய மகன் ஏங்கெல்ஸ் இளஞ்செழியன் அமெரிக்காவில் லாஸ் வேகாஸில் பெய்லி நிறுவனத்திலும், மகள் லெனினா தேவி அமெரிக்காவில் மைக்ரோசாஃப்ட் நிறுவனத்தின் தலைமையகத்திலும் பணிபுரிகின்றனர். மூவருக்கும் திருமணமாகிப் பிள்ளைகள் உள்ளன.

வரலாறு இன்னும் தொடரும்...