இலக்கிய முகப்பு | கவிதை முகப்பு

ஏமாற்றங்களைத் தாங்க முடியாமல்
விம்மியழும் இதய மென்மைகளைத் தூங்கவைக்க-
அந்த மயானங்களில்…
ஒரு தாலாட்டுக்காகத் தவமிருக்கிறேன்.

என்னால் என்னை நிலைநிறுத்த முடியாதபோது
என் குறைபாடுகளை முறையீடுகளாக்கி
சரண் அடைகிறேன் – சில நீதிமன்றங்களில்!

நம்ப மறுத்துச் சத்தியம் வாங்கப்பட்ட பிறகே
வாக்குமூலங்கள் கேட்கப்படுகின்றன.
விசாரணயே சந்தேகத்தில் தொடங்கும்போது,
அப்ரூவருக்கும் தண்டனை கிடைப்பதில்
ஆச்சரியம் ஏதுமில்லை.

நான் என் கட்டுக்குள் அடங்காதபோது,
என்னை நான் அடகு வைத்துவிடுகிறேன்.
ஏலத்துக்கு வரும்போதுதான்
என்னை மீட்டுக் கொள்ள எண்ணுகிறேன்.

என்னிடம் விவாதிக்க மறுத்து
என் இதயம் ஊமையாகிவிடும்போது-
நான் அதிகமாய்ப் புலம்புகிறேன்.
என்னுள் விவாதங்கள் நடந்து,
முடிவுகள் எடுக்கப்படும்போது-
நான் ஊமையாகிவிடுகிறேன்.

அதுவரையில்-
விம்மியழும் இதய மென்மைகளைத் தூங்கவைக்க
அந்த மயானங்களில்…
ஒரு தாலாட்டுக்காகத் தவமிருக்கிறேன்.

இலக்கிய முகப்பு | கவிதை முகப்பு